Јужнокорејската опозиција побара од властите да ги истражат наводите за американска шпионажа во различни земји од објавените тајни документи кои се чини дека откриваат дека Вашингтон го следи и својот азиски сојузник.
Посебно чувствителните тајни американски документи објавени на интернет во последниве недели се чини дека укажуваат на тоа дека САД ги шпионирале советниците за национална безбедност на јужнокорејскиот претседател Јун Сук-Јол за да гарантираат испорака на оружје за Украина.
Објавувањето на овој документ предизвика критики во Јужна Кореја поради чувствителноста на комуникациите во клучните тела на земјата, вклучително и нејзиното претседателство.
Политичките противници ја обвинија владата дека се обидува да го игнорира инцидентот и да ги ублажи односите со американскиот сојузник пред посетата на претседателот Јун на Вашингтон подоцна овој месец.
„Владата треба целосно да ги расветли наводите за прислушување, а доколку се покажат како основани, треба да добие извинување од САД и гаранции дека тоа нема да се повтори“, изјави денеска Ли Џе-Мјунг, лидер на опозициската Демократска партија. Десетици фотографии од документите веќе неколку недели се објавуваат на социјалните мрежи и сервисите како Твитер, Телеграм и Дискорд.
