Во услови кога не е обезбеден лек за сите пациенти со цистична фиброза, в.д. директорката на Клиниката за детски болести, Стојка Фуштиќ, објасни по кои критериуми ќе се дели „трикафта“.
Таа рече дека предност имаат пациентите со полоша белодробна функција, а кога ќе се добие лекот, ќе го добијат и пациентите со умерена белодробна болест.
„Во услови кога не е обезбедена терапија со ‘кафтрио’ за сите пациенти со цистична фиброза, кои ги исполнуваат критериумите за неа (80-ина), предност за терапија им даваме на пациентите со полоша белодробната функција изразена преку FEV1 (форсиран експираторен волумен во првата секунда). Договорот за тоа кои пациенти ќе бидат вклучени е помеѓу докторите од двете клиники, кои се одговорни за лекување на пациентите со цистична фиброза.
Со обезбедување терапија за поголем број пациенти, „кафтрио“ во комбинација со „калидеко“ ќе добијат и пациентите со умерена белодробна болест“, вели Фуштиќ.
Терапијата почна да се дава пред еден месец кај 8 пациенти, а од вчера и кај уште 4 пациенти со цистична фиброза на клиниките за детски болести и за пулмологија. Терапијата е индицирана кај пациенти со цистична фиброза, кои имаат 6 и повеќе години и барем една F508del-мутација во генотипот, додава Фуштиќ.
Асоцијацијата за цистична фиброза не добила известување ниту за тоа дали се најдени пари за набавка на лекот за сите болни ниту, пак, дали Министерството за здравство веќе направило план со кое темпо другите болни ќе го добиваат лекот.
Од таму велат дека во земјата има вкупно 140 пациенти со цистична фиброза. Апелираат што побргу да почне набавка на лекот за сите пациенти оти со тоа не само што ќе им се помогне на болните, меѓу кои има и деца, туку ќе се намалат трошоците на државата бидејќи тие болни ќе престанат да користат многу од лековите што сега мораат да ги земаат.
