Тримесечното бело тигарче кое пред шест седмици во лоша состојба беше напуштено пред Зоолошката градина во Атина, и покрај напорите на ветеринарите во изминатиот период, не успеа да се излечи,а поради сериозните здравствени проблеми, евтаназијата беше единственото решение, јави дописничката на МИА од Атина.
-Малата Хасија денеска безболно си замина во просторот каде што живееше во изминатиот период и меѓу луѓето кои се грижеа за неа, ја сакаа и многу се врзаа за неа во текот на овие 6 седмици, соопштија од „Атика парк“, Зоолошката градина во Атина.
На крајот на февруари, малото тигарче било пронајдено во ѓубрето пред Зоолошката, без притоа да биде познато кој и зошто го оставил.
Вработените веднаш се погрижиле за тримесечната женка која го добила името Хасија и во изминатите шест седмици освен што се грижеа за неа, се обидоа да спасат и преку низа испитувања и анализи да ја излечат.
![тигарче атина](https://mia.mk/articles/images/%D0%B8%D0%B7%D0%B2%D1%80%D1%88%D0%B5%D0%BD%D0%B0%D0%B5%D0%B2%D1%82%D0%B0%D0%BD%D0%B0%D0%B7%D0%B8%D1%98%D0%B0%D0%BD%D0%B0%D0%B1%D0%BE%D0%BB%D0%BD%D0%BE%D1%82%D0%BE%D0%B1%D0%B5%D0%BB%D0%BE%D1%82%D0%B8%D0%B3%D0%B0%D1%80%D1%87%D0%B5%D0%BE%D1%81%D1%82%D0%B0%D0%B2%D0%B5%D0%BD%D0%BE%D0%BF%D1%80%D0%B5%D0%B4%D0%B7%D0%BE%D0%BE%D0%BB%D0%BE%D1%88%D0%BA%D0%B0%D1%82%D0%B0%D0%B2n0EU7/CrySQxMHL/large.webp?use_watermark=0)
Резултатите од испитувањата биле испратени и до специјализирани центри во Европа, Америка и Африка за да се разгледа можноста животното да се пренесе во некој од нив за понатамошно лекување, меѓутоа одговорите биле негативни.
Паралелно, Министерството за животна средина на Грција формирало 12-член комитет од грчки ветеринари, кој дал своето мислење врз основа на медицинските податоци.
-За жал, сериозните, неизлечиви и болни генетски проблеми, некомпатибилни со елементарен квалитетен живот и благосостојба, ги одведоа и грчките ветеринари членови на комисијата, но и странските експерти, едногласно да препорачаат до надлежните органи дека евтаназијата е единствената опција, како што често се случува кога животното страда без да постои надеж за подобрување, соопштија од „Атика парк“.
Евтаназијата била извршена по наредба на властите и во присуство на ветеринари од периферијата.
![тигарче атина](https://mia.mk/articles/images/%D0%B8%D0%B7%D0%B2%D1%80%D1%88%D0%B5%D0%BD%D0%B0%D0%B5%D0%B2%D1%82%D0%B0%D0%BD%D0%B0%D0%B7%D0%B8%D1%98%D0%B0%D0%BD%D0%B0%D0%B1%D0%BE%D0%BB%D0%BD%D0%BE%D1%82%D0%BE%D0%B1%D0%B5%D0%BB%D0%BE%D1%82%D0%B8%D0%B3%D0%B0%D1%80%D1%87%D0%B5%D0%BE%D1%81%D1%82%D0%B0%D0%B2%D0%B5%D0%BD%D0%BE%D0%BF%D1%80%D0%B5%D0%B4%D0%B7%D0%BE%D0%BE%D0%BB%D0%BE%D1%88%D0%BA%D0%B0%D1%82%D0%B0%D0%B2zYwio/uH24jLQcI/large.webp?use_watermark=0)
Од атинската Зоолошка истакнаа дека оваа тажна приказна треба да биде повод сите да станат посвесни за потребата од борба против шверцот на диви животни Грција и да се интензивираат напорите на надлежните органи во оваа насока.