Франција е првата земја која воведува „дигитален сертификат“, со кој се докажува полнолетството за сите оние кои сакаат да гледаат порнографија на интернет. Луѓето кои сакаат да посетуваат порнографски веб-страници ќе мора да инсталираат владина апликација на своите мобилни телефони за да докажат дека имаат најмалку 18 години, најави францускиот министер за дигитални медиуми Жан Ноел Баро.
Веб-страниците кои не се во согласност со правилата ризикуваат да бидат забранети да се прикажуваат во Франција. Процесот на сертификација ќе биде анонимен и ќе се спроведува до септември оваа година, соопшти француската влада.
Најавата доаѓа во време на жестока дебата во Британија за Законот за безбедност на интернет, само неколку дена откако бунтовничките конзервативни пратеници повикаа на построги безбедносни проверки на возраста.
На децата во Франција им е забранет пристап до порнографија, но сегашните закони бараат од корисниците само да кликнат на копче што покажува дека имаат над 18 години, без никакви други проверки за да се уверат дека се навистина возрасни. Недостигот од дополнителни проверки е една од главните причини што децата пристапуваат до порнографски содржини на просечна возраст од 11 години.
Новиот систем за верификација на возраста ќе работи слично на верификацијата што ја бара банката при купување преку Интернет. Според Le Parisien, од телекомуникациските оператори може да се бара да потврдат дека корисникот е возрасен со испраќање потврда на мобилен уред чиј број е поврзан со поединецот.
– Франција ќе стане првата земја во светот со такво решение, рече тој. Водечките онлајн порно сајтови YouPorn, PornHub и RedTube одбија да ги коментираат новите правила.
