Репрезентацијата на Англија го заврши настапот на 22. Светско фудбалско првенство и тоа откако во четвртфиналето загуби од Франција со 2-1.
Според легендарниот германски фудбалер и стратег Јирген Клинсман своја улога во промашениот пенал на Кејн одиграл ВАР системот.
-Премногу време помина од ВАР проверката до изведувањето на пеналот. Јас сум голем обожавател на Хари Кејн. Да имаше шанса само да ја спушти топката и да го изведе пеналот, веројатно ќе дадеше гол. Фудбалерите губат премногу време на теренот при ВАР проверките. Тогаш изведувачот на пеналот премногу размислува, доаѓа до деконцентрација и потоа се случуваат вакви ситуации како на натпреварот меѓу Англија и Франција -рече Јирген и додаде:
-Англија одигра многу добар турнир. Како тим, тие се уште растат, имаат многу талентирани играчи и го стекнуваат потребното искуство на големите турнири. Мислам дека нивниот натпревар со Франција дојде прерано. Требаше да играат со Французите во полуфинале или финале – заклучи Клинсман кој своевремено беше селектор на Германија и на САД.
