Претседателот на Алијанса за Албанците, Зијадин Села вечерва на дебатниот магазин „Click Plus“ на ТВ21 најави дека од понеделник ќе почне процесот на формирање ново мнозинство во Собранието.
-Коалициските партнери на Заев нема да сакаат да одат со Заев на наредните избори, затоа што гледаат дека Заев тоне. Тие имаат и пратеници сега. Ние ќе создадеме ново мнозинство, рече Села.
На прашањето каде ќе најдат уште петмина пратеници, колку што им недостасуваат заедно со ВМРО-ДПМНЕ, Села рече дека тоа ќе може да се види во понеделник.
-Немам контакт со нив (Левица), ќе видиме. Ќе земеме можеби и од ДУИ пратеници. Како и да е, од понеделник ќе започне процесот на собирање на доволен број пратеници и создавање на ново владино мнозинство!, најави Села.
Тој посочи дека чудно му е што премиерот Зоран Заев е многу критичен кон него, а токму со негова помош станал премиер.
-Слушам и гледам дека Зоран Заев е доста критичен со мене последно време. Чудно, да. Чудно е затоа што таму каде што е сега, е со моја помош. Гледам со ДУИ сега се во добри односи. Лани беа противници, сега се заедно. Имаат коалиција со ДУИ за овие избори. И како одговор на тоа, ние направивме соработка со ВМРО-ДПМНЕ, вели Села.