Заложбите на Министерството за образование и наука и на Владата за поттикнување и развивање на критичкото мислење и свесноста за климатските промени и животната средина кај децата и младите се огромни и тие може да се видат веќе во пракса, бидејќи се дел и од реформските процеси кои започнаа од оваа учебна година во основното образование, истакна денеска министерката за образование и наука Мила Царовска на Младинскиот самит за климатски промени.
Како што информира МОН, таа се заблагодари на УНИЦЕФ и Шведската агенција за меѓународна соработка кои ја усвоија тригодишната програма за децата насочена кон унапредување на образованието за животната средина и климатските промени.
– Оваа програма е интегрирана во новите наставни програми подготвени со новата Концепцијата. Глобалното делување и широко искуство кое несебично го споделивте е непроценлив придонес кон обезбедувањето подобри можности и поквалитетно образование за нашите млади, рече Царовска.
Свеста за грижа кон опкружувањето, посочи таа, иницијално се развива преку едукацијата и воспитувањето внатре во семејството, но системски најдобро се врежува во карактерот и однесувањето на цели генерации, преку воспитно-образовниот процес во училиштата.
– Во училиште треба да се учи за грижата, љубовта и заштитата на животната средина и во тој дел институциите на системот и ние кои раководиме со нив, можеме многу да помогнеме и да придонесеме за поставеноста на образовниот систем. По ново, наставниците имаат можност освен преку редовна настава за време на часовите, туку и преку дополнителни воннаставни активности да ја подигнуваат свеста кај младите за овие важни прашања и со тоа да создаваат вистински носители на промени, со цел оваа планета да стане подобро место за живеење, рече Царовска.
Министерката истакна дека промени се започнати и во средното образование, особено во стручното кое е степен повеќе кон формализација на стекнатото знаење од примарната едукација.
-Зелените работни места се иднината на секоја држава, затоа навистина сите ресори треба да вложат максимални напори во создавање на овие работни места, а ние како креатори на образовните политики да создадеме наставни програми со кои ќе оспособиме кадри кои ќе може да одговорат на овие нови предизвици, рече Царовска.
На самитот говореа и претседателот на државата Стево Пендаровски, министерот за животна средина Насер Нуредини, амбасадорите на Шведска, на Обединетото Кралство и на Италија во Северна Македонија, Бенгстон, Галовеј и Силвестри, и претставници на Шведската агенција за меѓународна соработка.
