Компанија за спортска исхрана со седиште во Флорида, под назив REDCON1, во вторникот објави дека целосно ја прекинува поддршката за фитнес настаните на Арнолд Шварценегер, по жестоките пораки на бодибилдинг-иконата упатени кон антиваксерите во неодамнешниот разговор со „Си-ен-ен“.
Минатата недела, актерот и поранешен гувернер на Калифорнија зазеде цврст став за заштита среде пандемија додека зборуваше со Бијана Голодрајга од Си-ен-ен.
„Вирусот е тука. Тој убива луѓе и единствениот начин како да го спречиме е: вакцинирајте се, носете маски, држете социјална дистанца, мијте ги рацете цело време, а не само да размислувате: „Па, мојата слобода е нарушена“. По ѓаволите со вашата слобода, луѓе умираат,“ рекол тој, обраќајќи им се индиректно на антиваксерите.
„Имате слобода да не носите маска, но многу е неодговорно да не ја носите. Затоа што треба да ги заштитите вашите сограѓани Американци!“
Како одговор, основачот на REDCON1, Арон Сингермен, во објава на Инстаграм напиша: „Секој што вели screw your freedoms не е Американец, а REDCON1 е патриотски бренд за слобода. Ја поддржуваме слободата на избор. Не сакаме Арнолд да биде цензуриран или откажан. Ние едноставно не можеме да го поддржиме неговото мислење со нашите долари“.
