USNews
Шпанска компанија разви систем за извлекување вода за пиење од воздух за снабдување сушни региони каде што луѓето имаат голема потреба.
„Целта е да им се помогне на луѓето”, вели Енрике Веига, 82-годишен инженер кој ја измислил машината за време на суша во јужна Шпанија во ’90-те.
„Целта е да стигнеме до места како бегалски кампови каде немаат вода за пиење”.
Уредите направени од неговата компанија „Акваер” веќе испорачуваат чиста, безбедна вода за заедниците во Намибија и либански бегалски камп.
„Во селата што ги посетивме во Намибија, тие беа зачудени, не разбраа, прашувајќи од каде доаѓа водата”, рече тој.
Машините користат електрична енергија за ладење на воздухот додека не се кондензира во вода, искористувајќи го истиот ефект што предизвикува кондензација во системи за климатизација.
Додека другите генератори на вода базирани на слична технологија бараат висока влажност на околината и ниски температури за ефикасно функционирање, машините на Веига работат на температури до 40 Целзиусови степени и можат да се справат со влажност од 10 до 15 отсто.
Една мала машина може да произведе 50-75 литри дневно и лесно да се носи со количка, но поголемите верзии можат да произведат до 5.000 литри дневно.
„Нашата идеја не е само да направиме ефикасен уред, туку и да го направиме корисен за луѓето кои треба да пешачат со километри за да донесат вода или да направат бунари”, објасни Веига.
Виетнамскиот бегалец Нат Вуонг со седиште во Швајцарија се приклучи на каузата по средбата со Веига и посетата на бегалскиот камп во близина на Триполи во Либан во 2017 година.
Тој основа непрофитна организација „Water Inception “, која донесе 500-литарска машина во кампот.
„Работи прекрасно, навистина сум среќен”, рече Нат, кој сега собира средства за инсталирање соларни панели за да ги намали трошоците за електрична енергија и да го намали влијанието на проектот врз животната средина.
