Раководството на Либерално-демократската партија викендов прави стратешка анализа за одржаните парламентарни избори и за формирањето на новото парламентарно мнозинство во кое учествува партијата. Средбата се одржува во Охрид во хибриден формат, со физичко и онлајн присуство, а се реализира со поддршка на колегите од Шведска, Германија и Босна и Херцеговина, а во организација на Либералниот Институт од Скопје. Раководството на ЛДП, заедно со експерти и советници од своите сестрински партии, разговара за стратегиите и политичкото делување на партијата во рамките на Владата, Собранието, како и на локално ниво.
Особен осврт е посветен на новиот момент во кој се наоѓа државата, а тоа е формирањето на Владата како и најавениот почеток на преговорите за пристапување во Европската Унија кој се очекува во ноември оваа година.
Горан Милевски, претседател на ЛДП изјави: „Добро е што во услови на пандемија се спроведоа избори по сите здравствени протоколи и европски стандарди. Добро е што успеа да се постигнат позитивни резултати на изборите. Добро е што на македонската политичка сцена победија прогресивните сили. Добро е што новата владина програма вклучува голем дел од програмата на ЛДП и што партијата има можност да води значаен ресор во Владата. Овие поволности мора да се искористат максимално за доброто на граѓаните.”
Тој додаде: „Пред нас претстои клучен период во кој мора да се зацврстат темелите на либералната демократија. Тоа подразбира наше силно залагање за:
– зачувување на здравјето на граѓаните и поддршка за надминување на последиците од пандемијата на Ковид-19,
– гаранцијата за неказнивоста, правичноста и рамноправноста на граѓаните пред законот,
– почитување на различностите како и правата и слободите на секој/а граѓанин/ка,
– поголема вклученост на граѓаните во носењето на одлуки преку отворање на системот и негова децентрализација,
– зголемено инвестирање во нови технологии кои промовираат здрава животна средина, како и
– поттик на креативноста и инвентивноста како мотор за развој економијата и стандардот на граѓаните.”
За да можат да се остварат заложбите за такво општество ЛДП ќе направи сеопфатна ревитализација на партиските органи во следните недели. Истовремено, ЛДП ќе го даде својот максимум преку зголемен политички ангажман, засилена промоција на либералните вредности, зајакнување на кадровската подготвеност и интензивирање на координацијата со партнерите во државата и во Европа.
Размислуваме различно и отворено, нема да попуштиме пред популизмот и примитивизмот, а ќе осигуриме дека Македонија ќе се ја зацврстиме како либерално општество дел од ЕУ.
