„Рајанер“ ја затвора својата база на франкфуртскиот аеродром Хан, како и на аеродромите во Берлин и Дизелдорф веројатно кон крајот на летото, откако германските пилоти ги отфрлија предложените намалувања на платите, објави ирската нискобуџетна авиокомпанија. Таквиот потег вклучува неоткриен број на намалувања на работните места на пилотите, а следувал откако мнозинството германски пилоти гласале против предложениот договор за штедење. „Рајанер“ смета дека е неопходен, поради кризата со пандемијата на коронавирус.
„Треба да започнеме други мерки на штедење и тоа за жал ќе значи затворање на бази и отпуштања“, соопшти „Рајанер“ во писмото до германските пилоти.
Најголемата нискобуџетна авиокомпанија во Европа соопшти дека 70% од нејзините пилоти во Европа веќе прифатиле намалување на платите и нови услови поради пандемијата.
Во Ирска, управата го заобиколи синдикатот и ги принуди пилотите одделно да ги прифатат новите услови. Во Австрија, Рајанер најави затворање на филијала на виенската база Лауда пред да се склучи договор со некои пилоти и подоцна да се откаже.
Пилотите исто така се спротивставуваат на договорот затоа што понуденото работно осигурување ќе трае до март 2021 година, а намалувањето на платите до 2024 година.
Рајанер објави дека ќе ги запре летовите на аеродромот „Франкфурт Хан“ од почетокот на ноември, а оваа недела пилотите ќе добијат писма со отказен рок. Пилотите што летаат од аеродромите во Берлин и Дизелдорф најверојатно ќе престанат да работат пред зимската сезона, а деталите ќе бидат доставени до нив следната недела, се вели во соопштението.
По овие затворања, „Рајанер“ ќе го намали бројот на пилоти со седиште на аеродромите во Франкфурт, Келн, Берлин преку колективна постапка на отпуштање.
