Според последните податоци, во светот со коронавирус досега се заразени 8.647.266. Од нив починале 458.053, а оздравеле 4.571.782 луѓе.
– Бројот на заразени со коронавирус во Египет достигна 50.437 лица, откако во земјата се пријавени 1.218 нови случаи. Досега од Ковид-19 починаа 1.938 пациенти. Најнаселената арапска држава воведе рестриктивни мерки во март, затворајќи ги училиштата, рестораните и укинувајќи ги речиси сите меѓународни летови.
– Во Германија во претходните 24 часа бројот на заразени со коронавирус се зголеми за 770, соопшти Институтот „Роберт Кох”. Истовремено од последици на Ковид-19 починаа уште 16 лица, со што вкупниот број на смртни случаи е 8.872. Од почетокот на епидемијата во земјата се регистрирани вкупно 188.534 заболени.
– Во текот на ноќта во Албанијa починаa уште две лица заболени од Ковид-19, со што вкупната бројка на починати се искачи на 41 лице. Станува збор за 67-годишен маж од Тирана и 73-годишна жена од Скадар, кои боледувале и од други болести. По еден период на едноцифрени и ниски двоцифрени бројки на новозаразени, од минатиот понеделник бројот на заболени во едно деноноќие се движи од 50 до 82 лица. Вчера беа потврдени 66 нови случаи. Од почетокот на пандемијата вкупно заразени се 1.788, оздравеле 1.086, додека активни на болеста се 633 луѓе.
– Континенталниот дел на Кина пријави уште 32 случаја на коронавирус, од кои 25 се во пекинг, соопшти Националната здравствена комисија на Кина. Вкупно во земјата има 83.325 заразени. Локалните власти го ограничуваат движењето на луѓето во Пекинг и ги зајакнуваат другите мерки, со цел да се спречи дополнително ширење на вирусот, откако се забележани повеќе инфекции на локално ниво.
– Во Индија се регистрирани 13.586 новозаразени во последните 24 часа и тоа е најголем пораст на заболени во еден ден. Според податоците на Министерството за здравство, пријавени се и нови 336 починати. Вкупно во земјата се заразени 380.532 случаи, а починати 12.573 лица.
– Во Русија во последното деноноќие се забележани уште 7.972 случаја на Ковид-19, со што вкупната бројка на заразени достигна 569.063. Тоа значи дека трет ден по ред бројот на новозаразените нема надминато 8.000. Во последните 24 часа починало 181 лице, а вкупниот број на смртни случа во земјата достигна 7.841.
– Во Словенија се регистрирани два нови случаја на коронавирус, со што вкупниот број на заразени се зголеми на 1.513. Бројот на смртни случаи останува ист – 109. Последниот заболен од Ковид-19 почина на 31 мај.
– Неколку болници во САД ги лекуваат заразените со Ковид-19 со дексаметазон, без да чекаат потврда од научното истражување, чии прелиминарни резултати укажуваат дека тој ценовно најпристапен стероид ја намалува стапката на смртност кај тешките случаи на коронавирус.
– Фабрика за преработка на месо во западен Јоркшир е затворена поради локално ширење на новиот коронавирус. Тоа е трета фабрика во Велика Британија која е затворена, бидејќи станала жариште во изминатите неколку дена. Британија е најтешко погодена со коронавирусот во Европа со над 42.000 смртни случаи. Вистинскиот број на починати веројатно е поголем бидејќи сите жртви на Ковид-19 не биле тестирани.
– Чешка денеска пријави најголем број на новозаразени со коронавирус по два месеца, откако се забележани над 100 заболени третпат од средината на април. Во изминатите 24 часа во земјата се потврдени 118 новозаразени, со што вкупниот број достигна 10.283. Досега во Чешка починаа 334 лица.
– Во Австрија во последните 24 часа се регистрирани 48 нови заразени случаи со Ковид-19. Од нив најголем број, 35, се потврдени во Виена.
– Според официјалните податоци на Националниот штаб за цивилна заштита во Хрватска во изминатото деноноќие се потврдени 11 новозаразени лица со новиот коронавирус, со што вкупниот број на инфицирани од почетокот на епидемијата се зголеми на 2.280. Досега од коронавирус починаа 107 луѓе.
