По само три дена од кампањата „Скопје дома“, поради низата лоши коментари, Град Скопје реши да ја укине паричната наградата од 100 евра која требаше да ја доделува секој ден за една најкреативна фотографија направена дома.
Инаку, ваквата одлука од градските власти се поклопува и со денешното доделување кое предизвика многу негативни реакции на социјалните мрежи бидејќи денешниот победник на наградата беше Петар Прентовиќ, син на пратеничката од СДСМ во последниот парламентарен состав, Татјана Прентовиќ.
Претходните два дена, пак, награди на конкурсот добија Лариса Митиќ и Јехона Спахиу.
-Градот ја организираше кампањата на социјалните медиуми за поддршка на мерките на Министерството за здравство за повикување и охрабрување на граѓаните на главниот град да го поминуваат времето во своите домови. Поради појавените негативни коментари и немањето потреба оваа кампања да предизвикува контроверзии во јавноста, решивме од денеска да ја укинеме паричната награда на конкурсот, велат од Град Скопје.
https://www.facebook.com/skopjedoma/posts/112829297017635
Оваа кампања беше планирана да трае 30 дена и да има вкупен награден фонд од 3000 евра за да стимулира поголема вклученост на граѓаните во препораките во услови на вонредна состојба. Слични вакви повици Градот организирал на полето на образованието, урбанизмот, културата, именувањето на улиците и сл. и тие секогаш наидувале на позитивен прием во јавноста. Но, во овој случај не сакаме да долеваме масло на огнот и да придонесуваме во контроверзи во услови на вонредна состојба. Сметаме дека на Скопјани не им е потребен единствено финансиски поттик за да меѓусебно се охрабруваат како креативно да го поминат времето дома. Затоа, оваа страница ќе остане отоворена и секој ден ќе избираме најдобра фотографија, но без никаква награда.
