Крадци прво ограбиле па запалиле стан, синоќа во скопската населба Кисела Вода. Во пожарот нема повредени, а брзата реакција на противпожарната екипа спасила огнот да излезе од контрола и да се прошири во другите станови во зградата.
Според полицијата, синоќа околу 22 часот било пријавено дека има пожар во стан на улицата Христо Татарчев, сопственост на Ј.Г.(69) од Скопје, со живеалиште на друга адреса. Огнот зафатил дел од дневната соба, а повредени нема.
-Ова е трет пат да има грабеж во овој стан. Претходно два пати имаше кражба, а овој пат подметнаа и пожар. Во станот не живее никој. Сопствениците живеат во друга зграда, но близу до оваа. Крадците најверојтано знаат дека станот е празен и провалуваат, но не знам што мислат дека ќе најдат. Разбравме дека прво претурале по станот, барале вредни предмети но, не нашле ништо. Прво го запалиле каучот, по што огнот се проширил во собата. Сосетката која живее над нив случајно излегла на балконот и го забележала пожарот по што веднаш повикала пожарна екипа. Голема среќа е што пожарникарите стасаа за пет минути и го изгаснаа огнот, инаку штетата ќе беше огромна- ни кажа соседот со кого разговаравме.
Тој вели дека не се чуствуваат безбедно, и дека во нивната зграда често се случуваат кражби.
-Не сме безбедни. Многу често има кражби во нашата зграда, но и во соседните. Полицијата доаѓа откако ќе се случи кражба-вели нашиот соговорник.
Како што изјави командантот на Противпожарната брига на Град Скопје, Владимир Симоновски, се работи за пожар од помал обем, а оштетена е само една соба.
–Добивме дојава во 21.35 часот, по што веднаш интервениравме. Три возила го гаснеа пожарот со осум пожарникари. Ако немаше брза интервенција пожарот можеше да биде катастрофален за зградата, вели Симоновски.
Опожарени се 20 метри квадратни, а штетата е проценета на околу 200.000 денари.
Пожарот бил изгаснат од екипа на Бригадата за противпожарна заштита Скопје. Увид ќе се врши во текот на денот. Во станот, според пријавеното, претходно било насилно влезено од непознато лице, односно било извршено претурање, но до сега не е пријавено дека нешто е одземено.
(Д.В.)
Фото: Слободан Ѓуриќ
