Претседателот на Република Македонија, Ѓорге Иванов, упати честитка до сите христијански верници кои го прославуваат Божиќ според Грегоријанскиот календар.
„Рождеството Христово – Божиќ како еден од најсветлите и највозвишените денови во христијанството го симболизира новиот живот кој значи нов почеток и нова надеж. На овој важен ден имаме можност да се потсетиме на основните човечки вредности, да бидеме достојни верници и чесни луѓе, да живееме во хармонија и да шириме радост, љубов и добрина“, се вели во честитката на Иванов.
Тој додава дека различностите за време на празниците треба да нè зближат, а вредностите кои нè обединуваат да бидат силата со која се движиме и работиме.
„Во духот на долговековната традиција, посакувам празничните денови да ги минете во пријатна атмосфера, во кругот на најблиските исполнети со љубов и топлина. Нека ве следи добра мисла, Божиќен и човекољубив дух“, се додава во честитката.
