Судот во Гватемала осуди поранешен војник на 5.160 години затвор поради масакр на 171 човек – едно од најголемите злосторства во 36-годишната граѓанска војна во таа земја.
Според обвинителите, Сантос Лопез учествувал во масовните убиства во 1982 година речиси на сите мажи, жени и деца во земјоделското село Дос Ерес.
Тој е обвинет дека бил дел од елитната специјална единица што била пратена во Дос Ерес да ги пронајде припадниците на герилската група. Кога единицата не ги пронашла герилците или оружјето, ги извлекле селаните од нивните домови и, според обвинителите, силувале многу девојки. За да го прикријат силувањето, ги убиле речиси сите што живееле таму.
Масакрот е извршен за време на режимот на поранешниот воен диктатор Ефраин Риос Монт, кој умре во април.
