Ексминистерката за култура и актуелна пратеничка во Собранието, Елизабета Канческа Милевска, изјави дека денеска во законодавниот дом ќе имаат координација за законот за амнестија, поднесен од страна на ВМРО-ДПМНЕ, по што новоформираната пратеничка група ќе одлучи дали ќе го поддржи законот.
Во однос на пратеничкиот мандат на поранешниот премиер Никола Груевски, Канческа не се изјасни дали ќе гласа за негово одземање.
Новиот координатор на пратеничката група на ВМРО-ДПМНЕ, Никола Мицевски, претходно изјави дека ќе настапуваат како една пратеничка група зашто, како што нагласи, постоењето на повеќе групи не наишло на она што очекувале. Тој нагласи дека наишле на непочитување на деловникот и недавање можност да се искаже сето она што требало.
