Skip to main content
Свет

Уапсена иранската студентка која се разголе на јавно место заради малтретирањето од безбедносните служби

05/11/2024  12:02

Уапсена е Иранка која се соблече на јавно место во својата татковина во знак на протест поради малтретирањето од страна на безбедносните служби, пренесоа француските медиуми.

„Иранските власти мора веднаш и безусловно да ја ослободат младата жена“, напиша на мрежата Х организацијата за човекови права „Амнести Иран“, која е огранок на „Амнести интернешенел“.

Францускиот министер за надворешни работи Жан Ноел Баро го поздрави протестот на младата Иранка.

„Ја поздравувам храброста на оваа млада жена, која делуваше како чин на отпор и се издигна до ранг на икона за борбата на жените во Иран, за борбата на жените насекаде каде што нивните права се загрозени“, изјави Баро за француските медиуми.

„Нашата амбасада во Иран многу внимателно ја следи ситуацијата“, додаде министерот, без да навлегува во повеќе детали.

Иранките се во срцето на протестното движење што уследи по смртта на младата иранска Курдка, Махса Амини, во 2022 година, откако беше уапсена поради непочитување на строгиот ирански Кодекс на облекување.

Според невладините организации, во протестите загинаа 551 лице, а илјадници беа уапсени.