Претседателот на Република Северна Македонија, Стево Пендаровски, денеска го посети Државното правобранителство на Република Северна Македонија. Државниот правобранител Фехми Стафа го информираше претседателот Пендаровски за тековните активности на правобранителството, како и за предизвиците со коишто се соочува овој орган во вршењето на своите надлежности.
На средбата со државните правобранители беше нагласена важноста правосудниот систем во Северна Македонија да има соодветна, темелна и навремена реакција, целосно заштитена од политички влијанија. Главен предуслов за напредокот на секоја држава е токму владеењето на правото, односно, неселективното и независно судство што професионално, правично и непристрасно ќе ги спроведува законите, нагласи Претседателот. Тој потенцираше дека ова треба да биде наш императив со кој не смее да се прави компромис, не само за да ги задoволиме формалните критериуми за членство во ЕУ, туку за да ја вратиме довербата на граѓаните во државата и нејзините институции. Во овој период кога се подготвуваме за преговори за членство во Европската унија, сета енергија, експертиза и внимание треба да ги насочиме кон реформите во сферата на владеењето на правото, рече претседателот Пендаровски, подвлекувајќи дека во тие процеси Државното правобранителство има исклучително важна улога која треба да се извршува во интерес на државата и на нејзините граѓани.
