Можностите за унапредувањето на положбата на нашата дијаспора и нивна инклузивност во економскиот, политичкиот, социјалниот и културниот живот во Франција како и за актуелните политички цели на влада на Република Северна Македонија и Франција биле во фокусот на разговорите на министерот задолжен за дијаспора Едмонд Адеми на денешната работна средба со претседателот на Групата за македонско-француско пријателство во Националното собрание на Франција, Бертран Сор и пратеничката Лилиан Танги која е и член на Комисијата за надворешни работи при Националното Собрание.
Како што соопштија од кабинетот на министерот за дијаспора, на средбата на која Адеми бил придружуван од амбасадорката на Република Северна Македонија во Франција, Јадранка Чаушевска и директорот на Агенцијата за иселеништво Никола Шалваринов, посебен акцент беше ставен на ЕУ и НАТО интеграција на нашата држава и важноста на поддршката на Франција во овој процес.
-Во тој контекст, министерот ги запозна соговорниците со последните постигнувања на Владата на Република Северна Македонија во насока на изградба на праведно и инклузивно општество, засновано врз владеењето на правото и демократските вредности. Посебно се осврна на надворешно политичките приоритети, споделувајќи ја нашата посветеност и решителност за постигнување на решавачки исчекор во процесот на НАТО и ЕУ интеграција, преку финализирање и затворање на процесот за спроведување на Конечната спогодба со Грција, се наведува во соопштението.
Министерот Адеми притоа, се додава, ги потврди добрите билатерални односи со Франација, упати благодарност за досегашната поддршка и изрази очекување дека таа ќе продолжи во насока на донесување одлука во јуни за отпочнување на пристапните преговори со ЕУ.
Воедно, министерот посебно се заблагодари за досегашните заложби на пратениците од Групата за македонско-француско пријателство во Националното собрание на Франција за нивната континуирана и активна поддршка во насока на унапредување на меѓусебните билатерални односи и европската интеграција на земјата.
Од страна на соговорниците, беше реафирмирана нивната подготвеност да ги афирмираат активностите во насока на збогатување на добрите односи помеѓу двете држави и воедно, беше поздравен досегашниот напредок на нашата земја. -Во насока на европските интеграции, тие ја истакнаа поддршката на Француската влада и изразија уверување дека ќе продолжи позитивниот реформски тренд и имплементацијата на донесените реформи, стои во соопштението.
