Skip to main content
Македонија

Водата за пиење во Тетово со невообичаен вкус и мирис, но нема опасност по луѓето

15/11/2024  15:29

Деновиве повторно во Тетово, водата за пиење има невообичаен мирис и вкус, што од 2017 година се појавува речиси секоја есен во октомври или ноември, но надлежните уверуваат дека водата е безбедна за пиење.

Според д-р Ратко Давидовски од Центарот за јавно здравје Тетово, непријатниот мирис и вкус доаѓа поради паѓање на вегетацијата, најмногу од лисјата од дрвјата што паѓаат во речните води во месноста Лешница од каде се зема вода за новиот водоснабдителен систем.

-Нема опасност бидејќи мирис и вкус се субјективна категорија, водата е безбедна, кој може да ја пие, кој не може да не ја пие. Искуството од 2017 година досега покажало дека за неколку дена субјективнот мирис и вкус ќе го снема, изјави д-р Ратко Давидовски.

Годинава интензитетот е зголемен затоа што тетовскиот водовод повеќе користи вода од површинските односно речни извори.

-Поинтензивно е затоа што со 50 % учествува Лешнички систем во целокупното водоснабдување во градот. Треба да учествува со 30 проценти, другите количини да бидат од шарпланинските извори, но таму штедроста е значително намалена поради голема суша летово. Решение за да нема таков невообичаен вкус и мирис, е да се кондиционира на водата со озонирање или пак со активен јаглен. Озонирањето е потешко и поскапо, филтри со активен јаглен може да се направат за да не се случува, вели Давидовски.