Уставните измени се неопходен чекор за продолжување на патот на Македонија кон полноправно членство во Европската Унија, порача претседателката на Европската комисија, Урсула фон дер Лајен, на денешната средба со премиерот Христијан Мицкоски. Таа јасно истакна дека земјата се обврзала на спроведување на уставни измени, што претставува суштинска фаза во процесот на евроинтеграција.
„Имаме многу јасна цел пред нас – да го отвориме Кластерот фундаменти што е можно поскоро. Се работи за уставните измени кои вашата земја се обврза да ги спроведе. Ќе бидат потребни заеднички напори, соработка и дијалог, и се надевам дека сите политички сили во земјата ќе се обединат за да го направат овој одлучувачки чекор,“ истакна Фон дер Лајен.
Таа додаде дека Европската комисија ќе биде на страната на Македонија во секој чекор од процесот, обезбедувајќи поддршка за исполнување на преземените обврски. Покрај тоа, нагласи дека е неопходно да се фокусира на иднината и да се остават минатите пречки зад себе за да се постигне целта.
Премиерот Мицкоски, пак, ја потврди визијата на Македонија да стане дел од европското семејство, истакнувајќи дека очекува ЕУ да помогне во наоѓањето решенија за интегративниот пат на земјата, додека ги почитува ставовите на македонските граѓани.
„Ќе продолжиме да ги спроведуваме европските вредности и ќе направиме сè за да ја доближиме ЕУ до нашите граѓани. Но, истовремено, ќе се погрижиме да го зачуваме нивното достоинство и гордост. Верувам дека со синергија ќе успееме да стигнеме до конечната цел – полноправно членство во ЕУ,“ изјави Мицкоски.
Фон дер Лајен потврди дека проширувањето на Унијата ќе остане врвен приоритет и во наредните пет години, најавувајќи го Планот за раста за Западниот Балкан со предвидени 760 милиони евра, од кои првата транша ќе пристигне до крајот на годинава.
