Средното економско и правно училиште „Васил Антевски Дрен“, е добитник на престижната Европска награда за иновативна настава ( European Innovative Teaching Award ) 2024, благодарение на нашиот извонреден Erasmus+ проект: “Подобро ментално здравје на учениците преку иновативни методи, техники и компетенции на наставниците”, кој беше препознаен како еден од најдобрите во Европа.
Ова признание е доказ за посветената работа на целиот наш тим и истакнува колку е значајна темата на менталното здравје и благосостојбата во училиштата.Ова е успех на сите нас – на учениците, наставниците, родителите и партнерите кои веруваа во нашата визија за образование кое го негува и умот и срцето- изјави Радојка Хелман Денковска, професор и координатор на проектот.
Темата на четвртото издание на оваа награда беше добросостојбата во училиштата, со фокус на градење образовна средина која обрнува внимание на потребите, чувствителноста и можностите на учениците, на тој начин зајакнувајќи ја училишната заедница како целина.
Наградата ги прикажува извонредните иновативни практики за настава и учење, имплементирани во рамки на програмата Еразмус+, а ја препознава и работата на наставниците и училиштата кои даваат извонредни придонеси во нивната професија.
Продолжуваме со заложби за подобра и поинклузивна иднина за нашите ученици! За доброто на сите, за доброто на нашите ученици!- истакна Тања Јовановска, директор на Училиштето.
