Интегрален текст од соопштение за јавност на ПП Левица:
Уставниот суд денес ќе одлучува и по уште една Иницијатива поднесена од Левица со која оспоривме делови од Одлуката за определување и промена на имиња на улици и плоштади на подрачјето на Град Скопје, донесена од страна на Советот на Град Скопје во мандатот на Петре Шилегов.
Со оваа Одлука беа преименувани стотина улици во Скопје, меѓу кои и улиците „Втора македонска бригада” која се преименуваше во „Адем Демачи”, улицата „Лазо Москов” во „Ернест Колиќи”, улицата „Македонска Косовска Бригада” во „Митхат Фрашери” и улицата „191″ во „Сул Хотла”.
Ако се земе предвид животното дело на овие личности по кои се преименувани улиците, јасно е дека станува збор за контроверзни личности кои немаат никаква историска нишка со македонскиот народ и македонската држава. Напротив, истите делувале против унитарноста, интегритетот и суверенитетот на македонската држава.
Согласно позитивните законски норми во Република Македонија, не може да се определи име на улица, плоштад, мост и на друг инфраструктурен објект со кое се нарушува угледот на Република Македонија, се навредуваат националните чувства на граѓаните на Република Македонија и на граѓаните на други држави или да се нарушуваат односите меѓу заедниците, обичаите и јавниот морал.
Со преименувањето на овие улици, по имиња на балисти и фашисти, директно се повредуваат чуствата на македонскиот народ и се предизвикува етничка и верска нетрпеливост. Поради тоа, сметаме дека Уставниот суд треба да постапи по Иницијативата на Левица и да ја поништи оспорената одлука!
