Претседателот на Уставниот суд, Дарко Костадиновски, нагласи дека одржувањето на подготвителни седници е клучно за градење доверба кај граѓаните и за осигурување на независноста на Судот. Тој најави дека подготвителната седница за Законот за употребата на јазиците најверојатно ќе се одржи во март, откако Судот ќе го добие пријателскиот совет од Венецијанската комисија.
„Ќе ги судриме правните аргументи, а истото важи и за пријателскиот совет од Венецијанската комисија. Иако веќе имаме правно мислење, побаравме друга алатка која ја користат уставните судови за спорни правни прашања“, изјави Костадиновски во интервју за ТВ 21.
Тој очекува Венецијанската комисија да го достави својот совет на мартовската сесија, по што ќе се свика подготвителната седница. „Јас сум во контакт со експертите од Комисијата и очекувам да присуствуваат на седницата. Нашата задача е да донесеме одлука врз основа на аргументи, без влијание однадвор“, рече Костадиновски.
Костадиновски посочи дека Уставниот суд е изложен на закани и политички притисоци, нагласувајќи дека политичарите мора да престанат со ваквите практики. „Мислев да се пожалам до ЕУ за долгогодишниот притисок врз Судот. Како звучи кога некој ќе каже дека Уставниот суд работи на дестабилизација?“, запраша тој.
Коментирајќи ги изјавите на премиерот Христијан Мицкоски дека „ништо не се случило“, Костадиновски истакна дека Уставниот суд продолжува со постапката и дека подготвителните седници се клучна алатка за комплексни предмети.
Тој ги отфрли и повиците на ДУИ за негова оставка, оценувајќи ги како дел од политичка игра која нема место во судството. „Политичарите можат да водат битка за гласови, но не преку грбот на Уставниот суд“, изјави тој, додавајќи дека клеветите и навредите создаваат опасна атмосфера во општеството.
Претседателот на Уставниот суд подвлече дека довербата во институциите е нарушена поради прекумерната политизација. „Сите наши одлуки се уставно и правно втемелени. Со индигнација ги отфрлам обидите тие да бидат оквалификувани како политички или етнички“, заклучи Костадиновски.
