Претседателот на Украина, Володимир Зеленски, побара нова средба со американскиот претседател Доналд Трамп, откако нивни претставници повторно разговарале за најспорните прашања во мировните преговори за завршување на војната во Украина. Киев се наоѓа под постојан притисок од САД за брзо постигнување мир, но инсистира на долгорочни безбедносни гаранции од сојузниците и ги одбива руските барања за отстапување на источниот дел од Доњецката област и губење на контрола врз нуклеарната централа Запорожје.
Во разговор со новинарите преку „Ватсап“, Зеленски рече дека сака повторно да се сретне со Трамп за да ја оцени подготвеноста на САД да обезбедат безбедносни гаранции подолги од 15 години во случај на примирје. Тој го повика Трамп да изврши поголем притисок врз Русија, истакнувајќи дека Москва продолжува со воздушни напади врз украинските градови и енергетската инфраструктура и реагира ладно на мировните напори поддржани од САД.
„Американците во моментов се продуктивни и резултатите се добри. Мора да извршат притисок врз Русија. Имаат алатки и знаат како да ги користат“, изјави Зеленски. Белата куќа засега не дала коментар за можната нова средба меѓу Зеленски и Трамп.
