Полицијата го идентификуваше и го пронајде возачот кој на 16 март со автомобил удри 11-годишно девојче на улицата „Васил Ѓоргов“ во Скопје, а потоа избегал од местото на несреќата. Станува збор за С.Б. од Скопје, информираат од Министерството за внатрешни работи.
Според информациите од МВР, случајот бил пријавен во 16:10 часот од Ургентниот центар во комплексот клиники „Мајка Тереза“, каде што малолетното девојче било донесено со тешки телесни повреди.
Првичните сознанија укажуваат дека сообраќајната незгода се случила околу 13:20 часот на крстосницата меѓу улицата „Васил Ѓоргов“, сервисната улица и улицата „Народен Фронт“, кога патничко возило удрило во девојчето, по што возачот веднаш го напуштил местото.
По преземени оперативни мерки и активности, полицијата успеала да го лоцира и идентификува возачот.
Од МВР информираат дека против С.Б. СВР Скопје ќе поднесе кривична пријава по член 300 од Кривичниот законик, за тешки дела против безбедноста на луѓето и имотот во сообраќајот, како и по член 301, за неукажување помош на лице повредено во сообраќајна незгода.
Надлежните повторно апелираат до сите учесници во сообраќајот на поголема внимателност и одговорност, особено кога станува збор за безбедноста на пешаците и децата.
