Кардиналите од целиот свет се собраа изутрината на свечена миса во базиликата „Свети Петар“ во Рим, пред почнувањето на конклавата која ќе избере наследник на папата Франциск, пренесуваат агенциите.
Литургијата, предводена од шефот на Колеџот на кардинали, Италијанецот Џовани Батиста Ре, почна во 10 часот по локално време.
Таа му претходи на првото гласање на 133-те кардинали доцна попладне. Ова е најразновидната конклава во 2.000-годишната историја на христијанската црква, забележуваат агенциите.
Кардиналите од 70 земји ќе се изолираат од надворешниот свет без мобилни телефони, а сигналот околу Ватикан ќе биде пригушен за да се заштитат од каков било надворешен контакт додека не изберат нов водач на Католичката црква, која има 1,4 милијарди следбеници низ целиот свет.
За време на својот живот, Франциск именувал 108 од 133-те „принцови на црквата“, избирајќи многу пастори од земји далечни како Монголија, Шведска и Тонга, кои никогаш претходно немале кардинал.
Неговата одлука да го надмине вообичаеното ограничување од 120 кардинали избирачи и да вклучи помлади од „Глобалниот југ“ – оние често маргинализирани земји со помало економско влијание – внесе необичен степен на неизвесност во процесот кој отсекогаш бил полн со мистерија и тензии.
