Американскиот претседател Доналд Трамп денес објави дека Соединетите Американски Држави ќе доделат воена опрема вредна милијарди долари на Украина.
За време на заедничката прес-конференција во Белата куќа со генералниот секретар на НАТО, Марк Руте, Трамп го потврди договорот со членките на НАТО, претежно од Европа, за снабдување на „висококвалитетно“ оружје за помош на Украина, вклучувајќи ракетни системи „Патриот“, за кои рече дека ќе бидат испратени во земјата „во рок од неколку дена“ и дека сојузниците ќе платат за нив.
На прашањето дали ракети „Патриот“ или ракетни системи „Патриот“ се праќаат во Украина, Трамп одговори дека се испраќа „сè“. Тој појасни дека земјите-членки на ЕУ и НАТО ќе ги испратат своите системи „Патриот“ во Украина, а дека САД ќе испратат замена во тие држави.
Трамп исто така изјави дека САД ќе воведат стопроцентни санкции кон Русија доколку не се постигне договор за прекин на огнот во војната во Украина во рок од 50 дена. Тој рече дека е „многу, многу незадоволен“ од Русија. „Ќе воведеме многу строги тарифи ако не постигнеме договор во рок од 50 дена.“
Царините од приближно 100 проценти би се нарекле секундарни царини, рече Трамп, истакнувајќи дека царините ќе бидат воведени без согласност на Претставничкиот дом или Сенатот. Секундарните царини значат дека санкциите ќе важат и за други земји, поточно за земјите што купуваат руска нафта.
Кога беше прашан дали ќе бидат воведени царини од 500 отсто на Русија, тој рече дека бројот не е важен по одредена точка и дека царините од 100 проценти „ќе ја исполнат целта“.
Трамп изјави дека Москва мора да ја врати руската економија на вистинскиот пат и дека Русија има „огромен потенцијал“ и треба да ги користи своите ресурси за трговија, а не за војна. Зборувајќи за Путин, Трамп рече дека „многу разговара со него“ и дека тие разговори се многу пријатни, но дека разговорот „не значи ништо“ кога ракетите погодуваат градови.
Американскиот претседател рече дека чувствува оти имал договор со Русија за војната во Украина „околу четири пати“. „Мислев дека требаше да склучиме договор одамна, но тој продолжува и продолжува“, рече Трамп. На прашањето колку далеку е подготвен да оди како одговор доколку рускиот претседател Владимир Путин ги ескалира нападите, Трамп им рече на новинарите да не му го поставуваат тоа прашање. „Сакам војната да се реши. На крајот на краиштата, силна Европа е многу добра работа“, рече Трамп.
Трамп го пофали одбранбениот сојуз на НАТО, наведувајќи ги неодамнешните договори во кои земјите ги зголемија своите придонеси за одбраната и безбедноста од два проценти од бруто домашниот производ на пет проценти од БДП до 2035 година.
