Еден од најпознатите експерти по безбедност, професорот по криминологија, Ервин Карамучо за Еуроњуз Албанија, зборуваше за хакерскиот напад врз електронските адреси на обвинители од Специјалното обвинителство против корупција и организиран криминал, СПАК што се случил на 12 март.
За овој настан се уапсени две лица, Арнолд Рокај, осомничен дека ја извршил интервенцијата и Замбак Ѓони, осомничен за дистрибуција на украдени информации, но според Карамучо, тоа не се единствените лица кои се вклучени во злосторството.
-Земени се истражни досиеја, информации и извештаи за некои истраги кои се уште се непознати за јавноста, дека се уште има предмети за кои не знаеме дека се под истрага, а тоа го направи обвинителството уште порезервирано и со барање тие да се држат во тајност, бидејќи постои ризик лицата под истрага да избегаат, рече тој.
Според него, двете уапсени лица не се единствените виновници, па дури смета дека се вклучени политичари.
-Уапсените немале ниту големи хакерски вештини, имаат просечно знаење за тоа, па ве тера да се сомневате дека има и други луѓе кои знаат повеќе. Ова се извршители, но кој ги насочува? СПАК мора да има храброст да открие. Но, некои прелиминарни и се уште непотврдени информации велат дека трагите одат сè до Парламентот на Албанија. Има директно или индиректно инволвирани политичари, нагласи тој.
Посочи дека мотивот се уште не е познат „може да биде уцена, да се сврти вниманието, има многу причини кои СПАК треба да ги истражи”.
Вчера Специјалното обвинителство за корупција и организиран криминал (СПАК), соопшти дека на 12 март добило информација за незаконски упад во електронските адреси на неколку специјални обвинители, но оти „благодарение на безбедносните мерки, внатрешниот систем на СПАК останал недопрен“.
-Според проверките, упадот се случил само на електронските адреси на неколку обвинители и не влијаел на целокупниот ИТ систем на институцијата. Учесниците во овој чин успеале да добијат одредени информации, но не обезбедиле пристап до истражните досиеја. Се обиделе да го хакираат и мејлот на шефот на Специјалното обвинителство, Алтин Думани, но безуспешно, стои во соопштението на обвинителството.
Од друга страна дел од медиумите наведуваат дека хакерите, кои се албански државјани, презеле датотеки и ги препратиле на разни адреси.
И лидерот на опозициската Демократска партија, Сали Бериша рече дека „хакерите стигнале до истражните досиеја, меѓу нив и неговото“.
