Британскиот премиер, Кир Стармер, објави дека Велика Британија официјално ја признала Палестина како држава.
Одлуката на Велика Британија доаѓа пред конференцијата на Генералното собрание на Обединетите нации во Њујорк, каде што прашањата за палестинската државност ќе доминираат на агендата.
Признавањето на Палестина претставува голема промена во британската надворешна политика, откако претходните влади генерално веруваа дека признавањето треба да дојде како дел од сеопфатен мировен договор.
Актуелните британски министри тврдат дека имаат морална одговорност да дејствуваат за да ја одржат надежта за долгорочен мир.
Најавеното признавање беше критикувано од водечките американски политички личности, кои предупредуваат дека таков потег би можел да го зајакне Хамас и да ја загрози безбедноста на Израел.
Републиканските лидери во Конгресот, вклучувајќи ја и претседателката на нивниот пратенички штаб Елиса Стефаник и сенаторот Рик Скот, испратија писмо до Велика Британија, Франција, Канада, Австралија и други клучни земји кои го објавија признавањето на Палестина.
„Ова е непромислена политика што ги поткопува шансите за мир. Тоа поставува опасен преседан дека насилството, а не дипломатијата, е најефикасното средство за терористичките групи како Хамас да ги постигнат своите политички цели“, напишаа Стефаник и Скот.
Американскиот претседател, Доналд Трамп, за време на неговата државна посета на Велика Британија, изјави дека „не се согласува со премиерот“ во врска со признавањето на Палестина.
Група семејства на заложници предупредија дека признанието може да ги попречи напорите за нивно ослободување.
Во отворено писмо до Кир Стармер, тие напишаа:
„Вашето тажно соопштение за намерата на Велика Британија да признае палестинска држава на Генералното собрание на Обединетите нации драматично ги комплицира напорите за враќање на нашите најблиски дома. Хамас веќе ја прослави оваа одлука како победа и го прекрши договорот за прекин на огнот“.
Today, to revive the hope of peace for the Palestinians and Israelis, and a two state solution, the United Kingdom formally recognises the State of Palestine. pic.twitter.com/yrg6Lywc1s
— Keir Starmer (@Keir_Starmer) September 21, 2025
Канада и Австралија, исто така, официјално ја признаа палестинската државност.
Канадскиот премиер Марк Карни соопшти дека Канада официјално ја признава државата Палестина и го прави тоа со меѓународни партнери за да ја зачува перспективата за решение со две држави.
– Во текот на многу децении, посветеноста на Канада кон решение со две држави се темелеше на очекувањето дека овој исход на крајот ќе се постигне како дел од договорено решение. Сепак, таа можност „постојано и сериозно еродирашe“ од неколку случувања, вклучувајќи го нападот предводен од Хамас врз Израел на 7 октомври 2023 година, резолуцијата на израелскиот парламент со која се поддржува анексијата на окупираниот Западен Брег и ограничувањата на израелската влада за хуманитарна помош, се наведува во изјавата на Карни.
Австралискиот премиер Ентони Албанезе, пак, соопшти дека Канбера им се придружува на Лондот и Отава во донесувањето на оваа историска одлука.
– Австралија ги признава легитимните и долгогодишни аспирации на народот на Палестина за сопствена држава. Денешниот чин на признавање ја одразува долгогодишната посветеност на Австралија на решение со две држави, кое отсекогаш било единствениот пат кон траен мир и безбедност за израелскиот и палестинскиот народ, истакнува Албанезе.
