Вечерва на паркингот на ресторанот „Стара Ада“ во Бања Лука беше убиен Дејан Костиќ Дела, поранешен водач на навивачката група на ФК Борац, „Лешинари“. Настанот предизвика опсадна состојба, а местото го обезбедува голем број полицајци и медицински тимови. Телото на Костиќ е покриено со заштитна фолија, информира АТВ.
Според неофицијални извори, Костиќ бил во ресторанот со сопругата, кога на соседна маса се нашол тим со кој претходно бил во конфликт. По расправија и караница, Костиќ наводно излегол надвор за да земе оружје, но таму бил застрелан.
Костиќ беше добро познат на полицијата и судските институции, со досие кое вклучува повеќе кривични дела, како насилство, пукање и обиди за убиство. Во 2019 година беше осуден на парична казна од 9.000 KM поради злоставување келнер, инцидент кој ја шокираше јавноста.
Во 2022 година Костиќ беше ранет во пукање во населбата Старчевиќи. Вечерашниот инцидент ја потресе Бања Лука, а медиумите јавуваат дека е уапсено најмалку едно лице поврзано со убиството. Истрагата е во тек.
