Добриот ден не започнува со утринската рутина – започнува ноќта претходно. Начинот на кој ги поминувате последните часови од денот може значително да влијае на вашето расположение, енергија и фокус следното утро. Експертите од „HuffPost“ откриваат дека со мали, но значајни промени во вечерните навики можете да го трансформирате начинот на кој се чувствувате и функционирате во текот на денот.
Вечерна прошетка за смирен ум
Прошетката навечер може да биде едноставна, но многу ефикасна активност за релаксација. Неколку минути движење на свеж воздух, без разлика дали сами или со миленик, помагаат да се намали стресот и да се подобри варењето. Според психологот Ли Чемберс, „Прошетката ми овозможува да ги разбистрам мислите и да се подготвам за мирен сон“. Овој мал ритуал го смирува умот и создава чувство на завршеност.
Исклучете ги екраните – вашиот сон ќе ви биде благодарен
Дигиталните уреди честопати се најголемата пречка за квалитетен сон. Лори Сантос од Универзитетот Јеил нагласува дека исклучувањето на мобилните телефони и таблетите барем 30 минути пред спиење значително го подобрува квалитетот на сонот. „Држењето на телефонот подалеку од креветот помага да се избегне искушението да се проверуваат социјалните мрежи“, додава Сантос.
Топла купка – луксуз за телото и душата
Ништо не ја смирува нервозата како топла купка или туш. Психологот Џастин Гросо вели дека капењето навечер го подготвува телото за сон, ја намалува напнатоста и го подобрува расположението. Дури и кратко туширање може да ја намали телесната температура и да помогне побрзо да заспиете.
Свесност преку телесно скенирање
Една од најефикасните техники за релаксација е телесното скенирање. Додека лежите во кревет, свесно насочете го вниманието кон секој дел од телото. Оваа техника, според истражувачот Кортланд Дал, ја намалува анксиозноста и го подготвува умот за мирен сон.
Преглед на денот – насочете се кон позитивното
Место да размислувате за задачите што останале незавршени, фокусирајте се на малите победи и успеси од текот на денот. Запишувањето на позитивните моменти и напредокот создава чувство на исполнетост и ја зголемува мотивацијата за наредниот ден.
Вежба за благодарност – клуч за среќен живот
Пред да заспиете, одвојте неколку минути за да запишете три работи за кои сте благодарни. Овој едноставен чин, според истражувањата на психологот Роберт Емонс, може значително да ја зголеми вашата благосостојба и да го намали стресот.
Вечерните навики се темел за позитивно утро. Со мали промени можете да направите голема разлика во начинот на кој го доживувате секој ден.
