Управата за јавни приходи ги „чешла“ приходите од странство на нашите печалбари, но и на тие тука, кои имаат приливи од работа за странство. На „мета“ во првата фаза се приливите за периодот од јуни до крајот на 2020 година. А ќе се проверуваат и приходите од 2021 година до сега. До редакција на Скопје Инфо стигнале реакции на граѓани кои се изненадени дека добиле решенија за плаќање данок за 2020 година. Од УЈП потврдуваат дека прават проверки. Контролите покажале дека во периодот од јуни до декември 2020 година, околу 4.000 физички лица кои имаат остварено доход кој подлежи на оданочување го немаат пријавено и платено данокот.
-Целта на УЈП е физичките лица првенствено доброволно да се усогласат и да поднесат соодветни електронски пресметки. Секако доколку некој и покрај повикот на УЈП не се усогласи, УЈП врши генерирање на службени пресметки и носи решение за утврдување на данокот. До овој момент 462 физички лица доброволно се усогласиле и пријавиле данок во износ од 3.925.678 денари (63.832 евра) и платиле данок во износ од 2.592.483 денари (42.154 евра). Од страна на УЈП утврден е данок во износ од 349.193 денари (5.677 евра)за 48 физички лице, велат од УЈП.
Токму и директорката на УЈП, вчера како една од причините за пониска наплата на персоналецот за 2025-та година ги посочи и граѓаните кои времено работат во странство, кои ако се даночни обврзници во Македонија ќе треба да платат 10 отсто на своите приходи.
„Тоа се пред се приредувачите на игри на среќа и приливите од странство, оданочливите приходи што граѓани на Република Македонија ги остваруваат од странство. Од тие области каде што сме фокусирани, направивме доста анализи и проверки со вкрстување на податоци каде што ги забележавме тие трендови кои што ги посочив и сега имаме активности со постепено засилувачки карактер“, вели директорката на УЈП, Елена Петрова.
Но, кои граѓани треба да платат 10 проценти данок, односно кои приливи подлежат на оданочување.
–На оданочување подлежат приливите од странство кои ги оствариле физичките лица по основ на: доход од работа (плата, хонорари, интелектуални услуги, фриленс), доход од закуп (вклучително и преку платформи како Airbnb и Booking.com), капитални добивки (продажба на имот, криптовалути, хартии од вредност и друго),доход од капитал (дивиденди, камати, други финансиски приходи), авторски права, добивки од игри на среќа како и друг вид доход, велат од УЈП.
Од УЈП објаснуваат дека приливи од странство кои не подлежат на оданочување се приливите добиени по основ на подарок, семејна поддршка или трансфери преку Western Union, Ria, Moneygram и слични сервиси.
