Одделот за внатрешна контрола, криминалистички истраги и професионални стандарди при МВР поднесе кривична пријава до Основното јавно обвинителство за гонење на организиран криминал и корупција – Одделение за истражување и гонење на кривични дела сторени од лица со полициски овластувања и припадници на затворската полиција, против тројца полициски службеници од ПСОН Аеродром при СВР Скопје.
Кривичната пријава е поднесена против М.Т., С.Р. и Ф.Ѓ. за кривично дело „малтретирање во вршење на службата” по член 143 од Кривичниот законик (КЗ) и за кривично дело „нарушување на неповредливоста на домот” по член 145 став 2 од КЗ.
Според истрагата, на 24 февруари 2025 година, првопријавениот М.Т. и второпријавениот С.Р. пристигнале пред влезната врата на стан во Скопје, информирајќи го сопственикот дека треба да извршат службен разговор во врска со поднесена поплака од неговата сопруга. Откако оштетениот одбил да ги пушти во својот дом без судски налог, М.Т. насилно влегол во станот, го нападнал и го удирал сопственикот, обидувајќи се да го приведе, при што инцидентот се случил пред малолетното дете на оштетениот.
Со овие дејствија, М.Т. се товари за две кривични дела: „малтретирање во вршење на службата” и „нарушување на неповредливоста на домот”. Во исто време, С.Р. и Ф.Ѓ. се товарат за „нарушување на неповредливоста на домот”.
Дополнително, против тројцата полицајци е поднесен предлог за поведување на постапка за утврдување одговорност за кршење на работната дисциплина и суспензија од работното место додека трае дисциплинската постапка.
