Американскиот претседател Доналд Трамп сака да го врати највисокиот американски врв Денали на неговото поранешно име планината Мекинли, по 25-тиот американски претседател.
Врвот, кој се издига на 6.190 метри надморска височина, беше преименуван во „Денали“ од поранешниот претседател Барак Обама во 2015 година, усвојувајќи го името што со векови го користеа домородците од Алјаска.
Владата на Алјаска го направи тоа 40 години порано.
„Ќе ја преименуваме планината во чест на Вилијам Мекинли, голем претседател, како што треба“, рече Трамп во своето инаугуративно обраќање, за време на кое исто така изјави дека Мексиканскиот Залив отсега ќе биде „Американскиот Залив“.
Вилијам Мекинли, 25-тиот американски претседател, никогаш не го посетил Денали и нема врска со Алјаска или со планината, иако во негова чест беше именувана во 1917 година.
„Оваа објава е спротивна на желбите на домородните Американци, избраните функционери на Алјаска и вековната традиција“, рече Атан Мануел, директор за заштита на земјиштето на еколошката организација Сиера Клуб.
„Луѓето овде со векови го нарекуваа овој врв „Денали“, па дури и официјалните лица од Алјаска се противат на овој обид за преименување. Јасно е дека Доналд Трамп е повеќе заинтересиран за културната војна отколку за желбите на американскиот народ“, додаде тој.
