Студенти од Србија и Унгарија го изработија сателитот HUNITY, првиот уред кој е целосно направен во Србија и е испратен во вселената, соопшти Комитетот за развој на вселенската програма.
Сателитот е посветен на жртвите од падот на бетонската настрешница на железничката станица во Нови Сад. HUNITY има задача да тестира нови технологии во вселената, меѓу кои преклопни соларни панели, сензори и мини-научни инструменти.
На проектот работеа студенти од Универзитетот за технологија и економија во Будимпешта, како и од неколку факултети во Нови Сад, членови на Комитетот за развој на вселенската програма. Сателитот беше лансиран на 28 ноември со ракетата Falcon 9 (Transporter 15) на SpaceX. Методологијата е идентична со претходните UNITY 1, 2 и 3, лансирани во 2021 година во рамки на INDO-SERBIA Space Initiative, поради што и Индија учествува во програмата HUNITY.
Делегации од Унгарија и Индија престојуваа во Нови Сад од 25 октомври до 15 ноември, кога беше предложено сателитот да биде посветен на жртвите од несреќата што беше и усвоено.
„Сега треба да бидеме малку повеќе трпеливи, околу две недели, додека не го „фатиме“ првиот сигнал и да се увериме дека сè функционира, а потоа ќе следи реализација на заеднички и индивидуални вселенски мисии во сите три земји“, изјави Душан Радосављевиќ, одговорен за програмата HUNITY во Србија.
