Со 65 гласа „за“ и 14 „против“, Собранието попладнево го усвои Дополнетиот ребаланс на Буџетот за 2025 година. Расправата беше обележана со остри спротивставувања меѓу владејачкото мнозинство и опозицијата, кои имаа дијаметрално различни толкувања за овој клучен економски документ.
Власта уверува дека со ребалансот се обезбедува економски раст и подобрување на животниот стандард. Според нив, документот носи зголемени средства за пензионерите, младите и за капитални проекти во општините. Од парламентарната говорница беше нагласено дека се зголемени платите во образованието, здравството, полицијата и администрацијата, дека има најуспешен откуп на земјоделски производи и завршени инфраструктурни зафати.
Министерката за финансии Гордана Димитриеска-Кочоска изјави дека измените се во согласност со макроекономските движења и ги следат приоритетите: сервисирање на обврските, подобра распределба на расходите и поефикасно искористување на средствата. Таа истакна дека „ќе се финансира развој, а не изборна кампања“ и додаде дека Буџетот е насочен кон иднината, со поддршка за болници, училишта и патишта.
Но, опозицијата има сосема поинаков став.
Пратеникот Фатмир Битиќи од СДСМ оцени дека ребалансот не е развоен и не е социјално одговорен, туку селективен и скроен за краткорочни политички цели. Според него, се нарушени основните фискални правила, а буџетскиот дефицит од 4% од БДП го надминува законски дозволеното ниво. Битиќи истакна дека буџетскиот дефицит се зголемил двојно за само два и пол месеци, што е, како што рече, доказ за изгубена фискална контрола.
Тој предупреди дека домашното задолжување се зголемува за 3,15 милијарди денари, надворешното за 1,38 милијарди, а до крајот на годината се планира и ново задолжување од 500 милиони евра. Осврнувајќи се на проценките на Фискалниот совет, Битиќи рече дека јавниот долг ќе достигне 62,1% од БДП, што е над дозволената граница, а постојат и над 700 милиони евра неисплатени обврски кои реално го оптоваруваат буџетот.
Според него, се дуплираат трошоците за стоки и услуги, особено за набавка на автомобили, а речиси 2 милиони евра ќе се потрошат за штанд од 134 м² за ЕКСПО 2027 во Србија.
Оспорен беше и новиот закон за линеарно зголемување на пензиите – според Битиќи, со него 92% од пензионерите ќе добијат помалку отколку што би добиле со постојниот модел.
Пратеникот Халил Снопче додаде дека 25% од граѓаните живеат во сиромаштија, а цените на прехранбените производи се повисоки од оние во регионот и дел од европските земји. Тој оцени дека ребалансот не нуди решенија за овие горливи проблеми и ја загрозува фискалната дисциплина.
Ребалансот предвидува дополнителни средства за неколку ресори: 6 милиони денари за проектна документација за сообраќајница во Куманово, 50 милиони денари за социјални надоместоци и 5 милиони денари за Универзитетот „Гоце Делчев“.
И покрај поделбите и меѓусебните обвинувања, ребалансот помина во Собранието, отворајќи ново поглавје во буџетското планирање за 2025 година – со надежи за развој од едната страна и стравови од фискален колапс и предизборен популизам од другата.
