Претседателката Гордана Сиљановска-Давкова денеска ќе учествува на состанокот на шефови на држави и влади на „Акаба Процес Балкан III“ во Софија.
Како што јави известувачот на МИА од Софија, посетата се реализира на покана на претседателот на Република Бугарија, Румен Радев и кралот на Хашемитското Кралство Јордан, Абдула Втори.
Македонската претседателка ќе говори на првата сесија од состанокот насловена „Идентификување и разбирање на заканите“.
За време на посетата, предвидени се и билатерални средби на претседателката Сиљановска-Давкова со шефот на бугарската држава Румен Радев и со кралот на Хашемитското Кралство Јордан, Абдула Втори.
На состанокот, шефовите на држави, претставници на влади, меѓувладини и невладини организации ќе разговараат за безбедносни прашања со фокус на Балканот.
Форумот „Акаба процес за Балканот III“ е продолжение на претходните состаноци на оваа тема, одржани во рамките на иницијативата – во 2016 година во Акаба, Јордан и во 2018 година во Тирана, Албанија.
Целта на форумот во Софија е државните лидери од Југоисточна Европа, заедно со претставници на влади, институции и партнери на „Процесот Акаба“, да ја анализираат безбедносната архитектура на Балканот, да разговараат за регионалните механизми за размена на информации и да ги координираат напорите во борбата против илегалната миграција, тероризмот, радикализацијата и екстремизмот.
„Процесот Акаба“ е серија меѓународни состаноци за првпат иницирани од кралот Абдула Втори во 2015 година. Нивната цел е да ја одржат меѓународната и регионалната координација и соработка во борбата против тероризмот, екстремистичките идеологии и радикализацијата преку сеопфатен пристап. За да се поттикне отворен дијалог меѓу учесниците на состаноците на процесот Акаба, дискусиите се одржуваат во неформален амбиент.
Инаку, последната средба меѓу Сиљановска-Давкова и Радев беше на маргините на Конференцијата за климатски промени-КОП29 во Баку, Азербејџан, лани во ноември.
Тогаш од Кабинетот на претседателката информираа дека било разговарано за потребата од унапредување на македонско-бугарските односи, за надминување на отворените прашања меѓу двете држави, како и за можностите за продлабочување и динамизирање на билатералната соработка во повеќе области од взаемен интерес.
Бугарскиот претседател Радев, пак, укажал на потребата од брзо решавање на отворените прашања, како и на потребата од воспоставување на добри односи во сите области од заемен интерес за полесно меѓусебно разбирање.
