Претседателката на државата Гордана Сиљановска-Давкова денеска примила родители од Здружението на граѓани за третман на лица со аутизам, АДХД и Аспергерог синдром „Во мојот свет“, по повод 2 Април – Светскиот ден за подигање на свеста за аутизмот.
Како што информира Кабинетот на Сиљановска-Давкова, на средбата родителите истакнале дека сè уште се сами во борбата за подобрување на животот на нивните деца и дека отсуствува системско решавање на проблемите.
Родителот, велат тие, нема никаква поддршка. Има многу малку лични асистенти кои им помагаат, тешкиот товар паѓа на нив и затоа дел од нив не работат. Истовремено, поради отсуство на емпатија, секојдневно се соочуваат со чудни погледи и стигматизација на нивните деца. Најболно и најстрашно за нив, истакнуваат, е кога ќе помислат кој ќе се грижи за детето по нивната смрт, се наведува во соопштението.
Слушајќи ги проблемите со кои се соочуваат родителите, претседателката потенцирала дека децата треба да ни се најважни, бидејќи, како што рекла, „убедена сум дека секое дете може да дојде до израз ако му се даде шанса“.
-Во волонтерството таа препознава едно од можните решенија на проблемот. По примерот на САД и многу други држави, учениците, средношколци и студентите, како волонтери би добивале поени што ќе се земаат предвид при евалуацијата. „Да дадеш нешто, без да бараш ништо за возврат, тоа е едноставно љубов“, смета таа, наведува Кабинетот.
Голем проблем на којшто исто така посочиле родителите, се додава во соопштението, е отсуството на разбирање и прифаќање, „за жал, не се разговара ниту во семејството“. Според родителите, децата уште од градинка треба да учат дека некои нивни врсници се поразлични од нив и да ги прифатат како такви и оти само на тој начин ќе се развие инклузивната свесност.
-Во оваа насока, претседателката се заложи за креирање интегрално решение коешто ќе вклучи измени не само во законите за основно и за средно образование, туку и во други закони каде посебен дел ќе им биде посветен на децата со попреченост. „На тие деца им е потребно да учествуваат во социјалниот живот, а не да бидат оставени на маргините на општеството“, заклучи таа. Час поскоро треба да се обезбеди простор за Центарот за аутизам во Тетово, со оглед на веќе пристигнатата бугарска донација, информира Кабинетот на Сиљановска-Давкова.
Од здружението „Во мојот свет“ укажале дека забрзано расте бројот на лица со аутизам и од 2000 година до сега пораснал за 317 проценти.
Поради недостиг на национален регистар, според статистиката на ЕУ и на СЗО, се претпоставува дека во земјава има од 15 000 до 20 000 лица со аутистичен спектар на нарушување кои нестрпливо очекуваат разбирање и помош, се наведува во соопштението.
