Гласачите во Швајцарија со огромно мнозинство го отфрлаат предложениот данок од 50 проценти на наследство од 50 милиони швајцарски франци (62 милиони долари) и повеќе, според првичната проценка на јавниот радиодифузен сервис SRF, цитирана од агенциите.
Се очекува „данокот на најбогатите“ да биде отфрлен од 79 проценти од гласачите. Предлогот го поднесе младинското крило на левичарската Социјалдемократска партија за собирање средства за проекти за намалување на влијанието на климатските промени.
Неговото отфрлање беше очекувано откако две третини од испитаниците во последните анкети рекоа дека се против него. Банкарските кругови го следеа гласањето внимателно како тест за расположението за прераспределба на богатството во Швајцарија, откако други земји како Норвешка ги зголемија даноците за богатите или разгледуваат слични мерки.
Швајцарија се наоѓаат некои од најскапите градови во светот, а влијанието на незадоволството на граѓаните од трошоците за живот се чувствува сè повеќе во локалната политика.
Противниците на иницијативата за која се гласаше денеска тврдат дека одобрувањето на таква мерка би предизвикало многу богати луѓе да ја напуштат Швајцарија, што би ги намалило вкупните даночни приходи. Швајцарската влада ги повика граѓаните да го отфрлат предлогот.
