Свежата и повисоко израсната трева во пролет и рано лето претставува идеално живеалиште за крлежите – ситни, но опасни инсекти кои можат сериозно да го загрозат нашето здравје. Лекарите предупредуваат дека крлежите се вектори, односно преносители на различни заразни болести кои во некои случаи може да имаат долгорочни последици врз човековото здравје.
Најчестите болести што ги пренесуваат крлежите се медитеранска треска и лајмска болест (борелиоза), но не се исклучени ниту други бактериски или вирусни инфекции кои можат да предизвикаат сериозни симптоми како треска, осип, воспаление на зглобови, па дури и нарушувања на нервниот систем.
Во овој период од годината, кога многумина излегуваат на прошетки во природа, по паркови, ливади или шумски патеки, лекарите апелираат на зголемена внимателност и преземање превентивни мерки.
Најдобра заштита е соодветна облека:
- Носете светла облека, бидејќи крлежите обично се темни (црни или кафени) и полесно ќе ги забележите на светла ткаенина.
- Облеката треба да биде долга, да ги покрива рацете и нозете, со навлечени чорапи преку краевите од панталоните.
- Не оставајте откриени делови од телото кои би можеле да бидат погодни места за прикачување на крлежот, особено вратот, зад ушите, под пазувите и зад колената.
По секоја прошетка во природа, задолжително е внимателно да го прегледате целото тело, вклучувајќи го и скалпот, особено кај децата. Доколку забележите крлеж, треба веднаш и правилно да се отстрани со пинцета, без притискање или вртење, и по можност да се консултирате со лекар.
Превенцијата е клучна, бидејќи не секој крлеж е заразен, но не постои начин на око да се процени дали пренесува болест. Затоа, доколку по контакт со крлеж се појават симптоми како црвен круг околу местото на убодот, температура, замор или болки во мускулите, веднаш побарајте медицинска помош.
Крлежите не се безопасни – тие се тивки закани кои можат да остават трајни последици. Заштитете се себеси и вашите најблиски со правилно облекување, редовен преглед по прошетките и навремена реакција.
