Американската влада синоќа ја откри својата нова амбасада во Мексико, вредна повеќе од милијарда долари, што требаше да биде готова пред две години.
Амбасадорот на САД во заминување во Мексико Кен Салазар рече дека најголемата амбасада на САД во светот „го нагласува исклучителниот однос меѓу нашите народи и земји“.
Владата го постави камен-темелникот за новата амбасада во февруари 2018 година.
Новата амбасада се наоѓа на поранешна индустриска локација која бараше опсежно чистење од токсични материи. Областа, позната како Ново Поланко, вклучува модерни музеи и други престижни проекти развиени од Карлос Слим – еден од најбогатите луѓе во светот.
Сепак, новата зграда се уште не е отворена за јавноста. Ова најверојатно ќе се случи подоцна следната година, бидејќи работите продолжуваат.
Новоизбраниот претседател Доналд Трамп вети масовни депортации и му се закани на Мексико со големи тарифи доколку не направи повеќе за контрола на имиграцијата и трговијата со дрога.
Трамп го номинираше Рон Џонсон за следен амбасадор во Мексико. Џонсон беше американски амбасадор во Ел Салвадор за време на првиот мандат на Трамп.
