Проруска хакерска група ја презеде одговорноста за голем сајбер напад што ја наруши испораката на пакети и функционирањето на информатичките системи на француската национална поштенска служба La Poste, само неколку дена пред Божиќ, соопшти денеска париското обвинителство.
Според официјалното соопштение, одговорноста за нападот ја презела сајбер-криминалната група Noname057, по што истрагата ја презела француската служба за внатрешна безбедност DGSI. Нападот предизвикал сериозни технички проблеми токму во периодот кога поштенските служби работат со најголем интензитет во текот на годината.
Француската пошта соопшти дека нејзините централни компјутерски системи биле исклучени во понеделникот поради распределен напад на ускратување услуга (DDoS), кој сè уште не е целосно надминат. Поради тоа, вработените не можеле да ја следат испораката на пакети, а онлајн-плаќањата во банкарскиот огранок на компанијата биле значително отежнати.
Хакерската група Noname057 и претходно била поврзувана со низа сајбер напади во Европа. Француските власти наведуваат дека групата е осомничена за напади врз државни веб-страници во Франција, како и за координирани сајбер активности во пресрет на самитот на НАТО во Холандија, одржан во јуни годинава.
Потсетуваат и дека Noname057 била цел на обемна европска полициска операција на почетокот на годинава, насочена кон разбивање на транснационални хакерски мрежи. И покрај тоа, групата и понатаму се појавува како активен фактор во сајбер нападите насочени кон критична инфраструктура во Европа.
Нападот врз La Poste се случи во исклучително чувствителен момент. Француската пошта минатата година испорачала околу 2,6 милијарди пакети и вработува повеќе од 200.000 луѓе, што го прави секој поголем прекин сериозен логистички и економски удар.
Франција и други европски сојузници на Украина тврдат дека Русија спроведува т.н. „хибридна војна“, која покрај воените дејствија вклучува и сајбер напади, дезинформациски кампањи и обиди за дестабилизација на западните општества, со цел да се поткопа поддршката за Украина
