Русија ги приведе главниот лекар и вршителот на должноста раководител на одделението за интензивна нега во сибирско породилиште откако починаа девет новороденчиња, соопштија руските власти.
Рускиот државен истражен комитет објави дека лекарите се приведени под сомнение за предизвикување смрт од небрежност, додека осомничените не дале коментар за ова прашање, пренесува Ројтерс.
„Како резултат на неправилното извршување на службените и професионалните должности од страна на осомничените во организирањето и обезбедувањето медицинска нега, починаа девет новороденчиња родени помеѓу 1 декември 2025 година и 12 јануари 2026 година“, соопшти Комитетот.
Случајот предизвика широко распространето негодување низ цела Русија, со оглед на тоа што претседателот Владимир Путин го наведе зголемувањето на наталитетот како еден од приоритетите на земјата.
