Една жена предизвика бурни реакции на Reddit откако откри дека поднела барање за развод само 48 часа по свадбата, тврдејќи дека нејзиниот сопруг ја понижил пред сите гости со „шега“ која претходно повеќепати му ја забранила.
Во својата објава, таа раскажува дека уште пред свадбата јасно му ставила до знаење на сопругот Џејк дека не сака никакви непријатни шеги, особено популарниот тренд младоженецот да ја турка невестата во свадбената торта. Според неа, тој ја уверувал дека нема да направи ништо што би ја засрамило, иако во периодот пред свадбата станал опседнат со видеа од вакви свадбени „изненадувања“.
Таа почнала да забележува предупредувачки знаци кога Џејк инсистирал сам да избере фотограф, торта и да организира детали со своите пријатели. Иако ѝ било чудно, решила да му верува и да му ги препушти подготовките, мислејќи дека едноставно сака повеќе да учествува во организацијата.
Ноќта пред свадбата таа повторно го предупредила дека ако направи нешто спротивно на договореното, веднаш ќе го напушти. На самиот свадбен ден сè поминувало совршено сè до моментот на сечењето на тортата. Додека гостите гледале, а фотографот се подготвувал да го овековечи моментот, таа почувствувала рака на задниот дел од главата – и во следниот момент нејзиното лице завршило во тортата.
Шминката и венчаницата биле уништени, дел од гостите почнале да се смеат, а според нејзините зборови, најгласен бил токму младоженецот, кој дури изјавил дека тоа ќе биде нивната главна свадбена фотографија. Во лутина таа му удрила шлаканица и ја напуштила салата во солзи.
Неочекувано, поддршка добила од братот на младоженецот, Френк, кој тргнал по неа. Таа слушнала расправија во салата, а Френк го натерал Џејк да ѝ се извини лице в лице. Прославата практично била прекината, а Френк ја одвел дома бидејќи таа одбивала повторно да го види сопругот.
Во разговорот на пат кон дома, Френк ѝ открил дека ваквото однесување не било ново. Според него, Џејк со години имал навика да уништува важни моменти претворајќи ги во шеги – од фрлање торта на сопствени родендени до уништување подароци, однесување кое семејството го оправдувало како „безазлена забава“. Тој ѝ рекол дека не претерува ако се разведе и дека заслужува подобар однос, нудејќи ѝ помош доколку треба да ги собере своите работи.
Само два дена по свадбата, таа поднела барање за развод. Џејк тврдел дека станува збор за безопасна шега, додека дел од нивните семејства ѝ испратиле пораки дека е претерано да се раскине брак поради таков инцидент. Сепак, жената нагласува дека проблемот не е во тортата, туку во довербата.
„Ако е подготвен да ги игнорира моите граници и да го прекрши ветувањето на денот на свадбата, како да му верувам во нешто посериозно?“ напишала таа, додавајќи дека единствената вистинска поддршка ја добила од Френк и дека останува цврсто на одлуката за развод.
Нејзината приказна предизвика илјадници реакции на интернет, при што голем дел од корисниците застанаа на нејзина страна, оценувајќи дека понижувањето не може да се оправда како шега и дека младоженецот покажал непочитување и неискреност. Некои коментатори дури ѝ советувале да ја провери правната постапка, посочувајќи дека во одредени случаи, доколку документите не се финализирани навреме, бракот можеби формално и не стапил во сила.
