Првите резултати од истрагата за сообраќајната несреќа во која напаѓачот на Ливерпул, Диого Жота, и неговиот брат Андре Силва ги загубија животите минатата недела во Шпанија укажуваат на „голема брзина“ со која било управувано возилото, објави денеска шпанската Цивилна гарда.
Иако вештачењето сè уште е во тек, истражителите најавија дека одделно ќе ги анализираат „трагите оставени од едното тркало на возилото“, но дека сè укажува дека брзината на возилото во моментот на несреќата била значително над дозволената на тој дел од патот.
Според прелиминарните информации, Диого Жота го управувал возилото во моментот на несреќата, која се случи ноќта меѓу 2 и 3 јули на автопат во покраината Замора, во северозападна Шпанија.
Дваесетиосумгодишниот Жота и неговиот три години помлад брат Андре, фудбалер на португалскиот второлигаш Пенафиел, починале на местото на несреќата пред да пристигнат службите за итни случаи.
Нивното возило, луксузен спортски автомобил „Ламборџини Хуракан“, кој според португалските медиуми бил изнајмен, излетал од патот, а потоа се запалил, соопшти Цивилната гарда.
Жота патувал од Португалија до Сантандер, каде што требало да се качи на траект за Англија. Лекарите го советувале да не лета поради неодамнешната операција на белите дробови, па затоа покојниот Португалец се одлучил за автомобилот.
Жота се ожени само десет дена пред несреќата со својата долгогодишна партнерка, со која имаше три деца.
Диого Жота и Андре Силва беа погребани во саботата во нивниот роден град Гондомар, во близина на Порто.
