Вистински музички спектакл се случи синоќа на Градскиот стадион во Крива Паланка, каде повеќе од 50.000 луѓе ја проследија балканската ѕвезда Цеца Ражнатовиќ. Интересот за концертот беше огромен и далеку ги надмина очекувањата на организаторите, кои првично предвидоа околу 30.000 посетители.
Покрај Цеца, на сцената настапија и Дејан Петровиќ со Биг Бенд, Мики Секуловски, Никола Станишиќ и Диџеј Галоски. Иако беше најавен, Мирза Селимовиќ го откажа својот настап поради здравствени проблеми.
Градоначалникот на Крива Паланка, Сашко Митовски, утрово упати јавна благодарност до вработените во ЈП „Комуналец“, кои за неколку часа успеаја да го исчистат просторот, оставајќи впечаток дека таму и не се собрале десетици илјади луѓе.
Фестивалот продолжува и вечерва, кога главна музичка атракција ќе биде популарниот Саша Ковачевиќ.
