Силни врнежи од дожд, што предизвикаа и проблеми, и повеќе од 10.000 молњи беа регистрирани вчера попладне во северниот и централниот дел на Грција, според податоците од мрежата на автоматски метеоролошки станици на Националната опсерваторија во Атина и порталот Метео, јави дописничката на МИА од Атина.
Најголемо количество на вода беше забележано во областа Кукуш (Килкис), каде наврнаа дури 94,8 милиметри дожд.
Истовремено, покрај големите врнежи, беше забележана и значителна електрична активност, па до 18:40 часот беа регистрирани приближно 10.000 електрични испуштања, од кои 8.900 беа на земја, а останатите во море.
Краткотрајното, но моќно невреме создаде проблеми во Солун, а во регионот Тесалија, обилниот дожд и градот предизвикаа штета и на земјоделските култури.
