
Вооружен инцидент во Качаник ја потресе јавноста синоќа нешто пред полноќ, кога припадник на косовската полиција беше нападнат и застрелан пред зградата во која живеел. За медиумите ова го потврди Канун Весели, портпарол на полицијата.
Според официјалните информации, нападот се случил околу 23 часот на улицата „Идриз Сефери“ во Качаник. Тешко повредениот полицаец бил пренесен во Медицинскиот центар, каде подоцна им подлегнал на повредите.
„Синоќа околу 23 часот добивме информација дека едно лице е повредено и е во тешка состојба на влезот во неговата зграда. Повреден е припадник на косовската полиција. На местото на настанот, покрај полициските единици, пристигнала и екипа на Брза помош од Качаник, која го пренела во здравствениот дом. На местото на настанот пристигнаа регионални истражители и форензичари за да ги направат потребните вештачења. Причините за овој инцидент сè уште не се познати. За дополнителни информации ќе бидете навремено известени“, изјави Весели.
Истрагата за убиството е во тек, а полицијата засега не открива детали за можните мотиви и осомничени лица.